लेटाङ । लेटाङ नगरपालिकाले नगर क्षेत्रमा डेंगु रोगको प्रकोप फैलिन नदिन तयारी थालेको छ । नगरपालिकाले विहीबार नगर क्षेत्रका सरोकारवालाहरुलाई भेला गराएर डेंगु रोग रोकथाम तथा नियन्त्रणको अभियान थालेको हो ।
लेटाङ नगरपालिकाको आयोजना तथा विश्वास परियोजनाको प्राविधिक सहयोगमा नगरपालिकाको सभाहलमा भएको छलफलमा कोशी प्रदेश स्वास्थ्य मन्त्रालयका प्रवक्ता डाक्टर सुरेश मेहताले डेंगु रोगको विषयमा जानकारी गराउँदै नियन्त्रणका लागि अपनाउनुपर्ने उपाय बारे बताउनुभयो ।
उहाँले डेंगु नियन्त्रणका लागि फगिङ र विशादी छिट्ने भन्दा पनि खोज र नष्ट गर अभियान नै प्रभावकारी हुने भन्दै त्यसतर्फ काम गर्न नगरपालिकालाई सुझाव दिनुभयो । डेंगु फैलाउने एडिज प्रजातिको लामखुट्टेले सफा पानीमा अण्डा पार्ने र त्यसबाट धेरै संख्यामा लामखुट्टे उत्पादन भइ डेंगु फैलाउने भएकाले घर वरिपरि पानी जम्न नदिनेतर्फ ध्यान दिनुपर्ने उहाँको भनाइ छ ।
डेंगु फैलाउने लामखुट्टेको लार्भा खोजी गर्ने र नष्ट गर्ने अभियान हरेक ७ दिनमा सञ्चालन गर्न सके डेंगु नियन्त्रणमा प्रभावकारीता आउने उहाँले बताउनुभयो ।
छलफलपश्चात डेंगु नियन्त्रणका अन्य विधि भन्दा खोज र नष्ट गर अभियान नै प्रभावकारी र उपयोगी रहेको निश्कर्ष निकालिएको छ । कार्यक्रममा सहभागी सरोकारवालाहरुले समेत डेंगु रोग नियन्त्रणका लागि गर्नुपर्ने काम बारे नगरपालिकालाई सुझाव दिएका छन् । अब डेंगु नियन्त्रणका लागि वडावडामा समिति निर्माण गरि टोलटोलमा पुगेर खोज र नष्ट गर अभियान सञ्चालन गरिने नगरपालिकाको स्वास्थ्य शाखा प्रमुख केशव रिजालले जानकारी दिनुभयो ।
कार्यक्रममा बोल्दै नगर प्रमुख भूपेन्द्र कुमार लावतीले नगरमा डेंगु रोग देखापरिसकेकाले यसको नियन्त्रणका लागि नगरपालिका संवेदनशील भएर लागिपरेको बताउनुभयो । नगरपालिकाको एक्लो प्रयासले मात्र डेंगु रोग नियन्त्रण गर्न नसकिने भन्दै उहाँले सबै नगरवासीलाई सचेत भएर खोज र नष्ट गर अभियानमा साथ दिन आग्रह गर्नुभयो । उहाँले डेंगुको विरामी भएको अवस्थामा नगरपालिकाले नगर अस्पतालमै उपचार गर्ने व्यवस्था मिलाएको समेत जानकारी दिनुभयो ।
