लेटाङ । २०२६ को विश्वकप सकिएसँगै अब फुटबल समर्थकहरूको ध्यान २०३० को फिफा विश्वकपतर्फ केन्द्रित भएको छ ।
विश्वकप फुटबल प्रतियोगिता हुन थालेको १०० वर्ष पूरा हुने हुनाले आगामी विश्वकप प्रतियोगिता इतिहासमै पहिलोपटक छ वटा देश र तीन महादेशमा आयोजना हुने भएको हो ।
सो विश्वकप जुन महिनामा शुरु हुने बताइएको छ । विश्वकपका विशेष खेलहरू उरुग्वे, अर्जेन्टिना र पाराग्वेमा हुने भएका छन् । मुख्य प्रतियोगिता स्पेन, पोर्चुगल र मोरक्कोमा सञ्चालन हुने र जुलाइ २१ मा फाइनल खेल खेलाइने बताइएको छ ।
प्रतियोगिताको आयोजक राष्ट्र स्पेन, पोर्चुगल र मोरक्को रहने भएका छन् । विश्वकपको शतवार्षिकी मनाउन पहिलो चरणका एक–एक खेल भने उरुग्वे, अर्जेन्टिना र पाराग्वेमा खेलाइने भएको छ ।
विश्वकपको पहिलो प्रतियोगिता जितेको र आयोजना गरेको हुनाले एक खेल उरुग्वेमा खेलाइने भएको हो ।
१०० वर्ष अघि भएको पहिलो विश्वकपमा उपविजेता भएको अर्जेन्टिनाको सम्मान गर्दै समूह चरणको एउटा खेल खेलाइने भएको छ ।
सो समय अस्तित्वमा रहेको एक मात्र महादेशीय फुटबल महासंघ कन्मेबोलको घर भएको देश पाराग्वेले पनि एउटा खेल आयोजना गर्ने भएको छ । बाँकी खेल आयोजक तीन देशमा हुने भएको छ ।
प्रतियोगितामा ४८ टोली सहभागी हुने भएका छन् । आयोजक छ वटा देश स्वतः छनोट भइसकेका हुनाले बाँकी ४६ देश छनोट हुनेछन् ।
सन् २०३४ को विश्वकप भने साउदी अरेबियामा आयोजना हुने भएको छ । सो वर्षको विश्वकप आयोजना गर्न अरु कुनै पनि देशले इच्छा नदेखाएकाले साउदीले एक्लै विश्वकपको आयोजना गर्ने भएको हो ।
