लुम्बिनी । लेटाङ नगरपालिका र भगवान गौतम वुद्धको जन्मस्थल रहेको लुम्विनी साँस्कृतिक नगरपालिकाबीच औपचारिक रूपमा भगिनी सम्बन्ध स्थापना भएको छ ।
भगिनी सम्बन्ध स्थापना गर्नका लागि लेटाङ नगरपालिकाले राखेको प्रस्ताव स्विकार गर्दै लुम्विनी साँस्कृतिक नगरपालिकाले लेटाङ नगरपालिकालाई निमन्त्रणा गरेपश्चात लेटाङ नगरपालिकाका नगर प्रमुख भूपेन्द्रकुमार लावती र उपप्रमुख कृष्णकुमारी निरौलासहितका जनप्रतिनिधिहरु र कर्मचारीहरुको टोली कार्यक्रममा सहभागी हुन लुम्विनी पुगेको हो ।
लुम्विनी साँस्कृतिक नगरपालिकाको कार्यालयमा आइतबार आयोजित विशेष समारोहका बिच लेटाङ नगरपालिकाका नगर प्रमुख भूपेन्द्रकुमार लावती र लुम्विनी साँस्कृतिक नगरपालिकाका प्रमुख सजरुद्दिन मुसलमानले संयुक्तरूपमा १० बुँदे समझदारीपत्रमा हस्ताक्षर गर्दै भगिनी सम्बन्ध स्थापना गर्नुभयो ।
कार्यक्रममा लेटाङ नगरपालिका वडा नम्बर २ का वडाध्यक्ष तेजप्रसाद तिम्सिनाले १० वुँदे समझदारीपत्र वाचन गरेर सुनाउनु भएको थियो । समझदारीपत्रमा लेटाङ नगरपालिका र लुम्बिनी साँस्कृतिक नगरपालिकामा रहेका मुख्य धार्मिक, साँस्कृतिक, प्राकृतिक लगायतका पर्यटकीय स्थलहरुको प्रचार–प्रसार गर्ने तथा पर्यटन प्रवद्र्धनमा सहकार्य गर्ने उल्लेख गरिएको छ ।
यसैगरि लेटाङ नगरपालिका र लुम्बिनी साँस्कृतिक नगरपालिकामा उत्पादित मौलिक वस्तू तथा कृषि उपजहरुलाई एकआपसमा बजारीकरण गर्न सहयोग गर्ने, सिकाई आदान प्रदान गर्दै असल अभ्यासहरुलाई सँस्थागत गर्न सहजिकरण गर्ने, दैविक प्रकोप र प्राकृतिक विपत्तिमा एकआपसमा सहयोग आदान–प्रदान गर्ने लगायतका विषयहरु उल्लेख गरिएको छ । हस्ताक्षरपश्चात दुवै नगरपालिकाका नगर प्रमुखले एक–अर्कालाई समझदारीपत्र हस्तान्तरण गर्नुभयो ।
कार्यक्रममा दुवै नगरपालिकाका नगर प्रमुख, उपप्रमुख र प्रमुख प्रशासकीय अधिकृतले एकअर्कालाई माला र टीका लगाइ दिएर मीत्रता गाँसिएको सन्देश दिनुभयो । यसैगरि दुवै नगरपालिकाका वडाध्यक्षहरु, कार्यपालिका सदस्यहरु र कर्मचारीहरुले एकअर्कालाई माला र टिका लगाएर आत्मियता साटासाट गरेका थिए ।
कार्यक्रममा बोल्दै लेटाङ नगरपालिकाका नगर प्रमुख भूपेन्द्रकुमार लावतीले सँस्थागत सम्वन्धहरुले धेरै अर्थ राख्ने र महत्वपूर्ण हुने बताउनुभयो । उहाँले भौतिक विकासलाई मात्र विकास मान्ने गरिएको भन्दै भावना जोड्ने, मन जोड्ने, सँस्कार जोड्ने र मान्यता जोड्ने कुराहरुलाई प्राथमिकता दिनुपर्ने बताउनुभयो । उहाँले भौतिक विकास अस्थायी कुराहरु रहेकाले सँस्कार र सँस्कृतिको विकास स्थायी र अर्थपूर्ण हुने बताउनुभयो ।
कार्यक्रममा बोल्दै लुम्विनी साँस्कृतिक नगरपालिकाका नगर प्रमुख सजरुद्दिन मुसलमानले दुइ नगरपालिकाबीचको भगिनी सम्बन्ध सदासदाको लागि कायम रहने बताउनुभयो । उहाँले भगीनी सम्बन्ध दुवै नगरपालिकाका लागि फलदायी रहने भन्दै खुशी व्यक्त गर्नुभयो ।
कार्यक्रममा लेटाङ नगरपालिकाका नगर उपप्रमुख कृष्णकुमारी निरौलाले लेटाङ नगरपालिकाको संक्षिप्त परिचय दिनुभयो । उहाँले खासगरि लेटाङको भौगोलिक अवस्थिति, पर्यटकीय क्षेत्रहरु, साँस्कृतिक पक्षहरु र कृषि उत्पादन लगायतका विषयमा जानकारी गराउनुभयो ।
कार्यक्रममा लुम्विनी साँस्कृतिक नगरपालिकाकी प्रमुख प्रशासकीय अधिकृत तारा ज्ञवालीले मन्तव्य राख्दै लेटाङ नगरपालिकाको टोलीलाई स्वागत गर्नुभयो । उहाँले बुद्धलाई विश्वले चिनिरहँदा कतिपय नेपालीले नै नचिनिरहेको अवस्था रहेको भन्दै जीवनकालमा एकपटक लुम्बिनी टेक्ने वातावरण बनाउनु पर्ने बताउनुभयो ।
भगिनी सम्वन्ध स्थापनाको अवसरमा लेटाङ नगरपालिकाले लेटाङका पर्यटकीयस्थलहरुको फोटो अंकित मायाको चिनो प्रदान गरेको थियो भने लुम्विनी साँस्कृतिक नगरपालिकाले वुद्ध सर्किटको तस्विर र भगवान गौतम वुद्धको मूर्ती प्रदान गरेको थियो । यसैगरि भगिनी सम्वन्ध स्थापनाको अवसरमा लुम्विनी साँस्कृतिक नगरपालिका परिसरमा वृक्षारोपण समेत गरिएको छ । दुवै नगरपालिकाका नगरप्रमुख र उपप्रमुखले गमलामा स्वामीको विरुवा रोप्दै दुवै नगरपालिकाको सम्बन्ध वृक्ष झैँ झाँगिदै जाने सन्देश दिनुभयो ।
