लेटाङ । लेटाङ नगरपालिकाले प्रधानमन्त्री रोजगार कार्यक्रम अन्तरगत न्यूनतम रोजगार नागरिकको अधिकार विषयक अभिमुखिकरण कार्यक्रम सञ्चालन गरेको छ । आज आइतबार लेटाङ नगरपालिका वडा नम्बर १ स्थित थामडाँडामा नगरपालिकाले अभिमुखिकरण कार्यक्रम सञ्चालन गरेको हो ।
लेटाङ नगरपालिका रोजगार सेवा केन्द्रको आयोजनामा भएको कार्यक्रममा थामडाँडा टोलका स्थानीयवासीले प्रधानमन्त्री रोजगार कार्यक्रमका लागि आवेदन फारम समेत भरेका छन् । अभिमुखिकरण कार्यक्रमका लागि नगर प्रमुख भूपेन्द्र कुमार लावती, लेटाङ ५ का वडाध्यक्ष तथा नगर प्रवक्ता भूम सूर्य मगर, लेटाङ १ का वडाध्यक्ष विष्णु कुमार मगर र नगरपालिकाका रोजगार संयोजक दीपा घिमिरे सहितको टोली नगरको विकट पहाडी टोल थामडाँडा पुगेको थियो ।
सो अवसरमा प्रधानमन्त्री रोजगार कार्यक्रमको विषयमा जानकारी गराउँदै यसबाट वेरोजगार व्यक्तिहरुले लाभ लिन सकिने तथा आफ्नो ठाउँको विकासको काम समेत गर्न सकिने विषयमा जानकारी गराइएको छ ।
