सुन्दरहरैंचा । मोरङको सुन्दरहरैंचा ५ निवासी धर्मानन्द घिमिरेले स्थानीय विद्यालयमा खानेपानीको धारा निर्माण गरि दिनु भएको छ । । सुन्दरहरैंचा स्थायी ठेगाना भइ काठमाडौं बस्दै आउनु भएका घिमिरेले श्रीमती गीता घिमिरेको स्मृतिमा स्थानीय अमर ज्योति आधारभुत विद्यालयमा धारा निर्माण गरिदिनु भएको हो । शुक्रबार सुन्दरहरैंचा नगरपालिकाका नगर प्रमुख केदार प्रसाद गुरागाईंको प्रमुख आतिथ्यतामा विशेष कार्यक्रम गरि घिमिरे परिवारले विद्यालयलाई नवनिर्मित धारा हस्तान्तरण गरेका छन् ।
घिमिरेकी श्रीमती गीता घिमिरेको २०६९ सालमा निधन भएकोमा उहाँका छोरी ज्वाईंको उपस्थितिमा ढलानसहितको धारा निर्माण गरि हस्तान्तरण गरिएको हो । धाराको जडान खर्च, टायल, मार्वल सहितको संरचना निर्माण गरि व्यवस्थित धारा निर्माण गरि हस्तान्तरण गरिएको घिमिरेका ज्वाईं विशाल गुरागाईंले जानकारी दिनुभयो ।
विद्यालय व्यवस्थापन समिति अध्यक्ष बल बहादुर कार्कीको अध्यक्षतामा भएको धरा हस्तान्तरण कार्यक्रममा वडाध्यक्ष गणेश चौधरी, नागरिक समाजका प्र्रतिनिधि डिल्लीराम सिग्देल लगायतको आतिथ्यता रहेको थियो भने दाता परिवारबाट ज्वाई विशाल गुरागाईं, छोरी इन्दिरा गुरागाईं र नाति सौगात गुरागाईको सहभागिता रहेको थियो । कार्यक्रममा बोल्दै वक्ताहरुले विद्यालय जस्तो पवित्र संस्थामा धारा जडान गरेकोमा घिमिरे परिवारलाई धन्यवाद दिंदै असल कार्यको प्रशंशा गरेका छन् ।
