इटहरीः लायन्स इन्टरनेशनल डिष्ट्रिक्ट ३२५ सी अन्तर्गत एरिया–४ को सचिवालय औपचारिक रूपमा उद्घाटन गरिएको छ । डिष्ट्रिक्ट गभर्नर लीलाप्रसाद चिमरियाले लायन्स भवनमा आयोजित विशेष समारोहबीच सचिवालयको उद्घाटन गर्नुभएको हो ।
उद्घाटन समारोहमा एरिया–४ का एरिया चिफ दुर्गाप्रसाद पौडेलले डिष्ट्रिक्ट ३२५ सी अन्तर्गत रहेका सातवटा एरियामध्ये एरिया–४ ले सबैभन्दा पहिले सचिवालय स्थापना गरेको बताउनुभयो ।
उहाँले सचिवालय सञ्चालनसँगै एरियाभित्रका क्लबबीच समन्वय, सेवा गतिविधि तथा प्रशासनिक कार्य थप प्रभावकारी हुने विश्वास व्यक्त गर्नुभयो ।
समारोहलाई सम्बोधन गर्दै डिष्ट्रिक्ट गभर्नर लीलाप्रसाद चिमरियाले एरिया–४ ले छोटो समयमै सञ्चालन गरेका गतिविधि र सक्रियताको प्रशंसा गर्दै सचिवालय स्थापना एरियाको संस्थागत विकासतर्फको महत्त्वपूर्ण कदम भएको उल्लेख गर्नुभयो ।
अरु एरियालाई पनि यसले शिक्षा दिने बताउँदै उहाँले डिष्ट्रिक्ट ३२५ सीको पहिलो क्याबिनेट बैठक विराटनगरमा आयोजना हुन लागेको उल्लेख गर्दै उक्त बैठक ऐतिहासिक हुने दाबी गर्नुभयो । सो बैठकले डिष्ट्रिक्टको आगामी कार्यदिशा तय गर्नुका साथै सेवा अभियानलाई अझ प्रभावकारी बनाउने विश्वास आफूले लिएको उहाँको भनाइ थियो ।
कार्यक्रममा एरिया कोअर्डिनेटर भूपराज पुरीले लायन्सभित्र सकारात्मक प्रतिस्पर्धा आवश्यक रहेकोमा जोड दिँदै स्वस्थ प्रतिस्पर्धाले क्लबहरूलाई अझ सक्रिय, प्रभावकारी र सेवामुखी बनाउन सहयोग पुग्ने बताउनुभयो ।
सचिवालय उद्घाटन समारोहमा डिष्ट्रिक्ट तथा एरिया अन्तर्गतका पदाधिकारी, विभिन्न लायन्स क्लबका अध्यक्ष, सदस्य तथा समाजसेवीहरूको उपस्थिति थियो ।
