लेटाङ । लेटाङ नगरपालिकाले बजार अनुगमनलाई निरन्तरता दिने क्रममा विहीबार लेटाङ २ स्थित बुधाबारे बजारमा किराना पसलहरुको अनुगमन गरेको छ । लेटाङ नगरपालिका उपप्रमुख तथा अनुगमन समिति संयोजक कृष्णकुमारी निरौलाको नेतृत्वमा अनुगमनमा निस्किएको टोलीले बुधबारे बजारमा रहेका किराना पसल र केही कोल्ड सेन्टर गरि ९ वटा पसलमा अनुगमन गरेको हो ।
अनुगमनका क्रममा केही पसलहरुमा छिटपुछ रुपमा म्याद गुज्रिएका सामानहरु भेटिएको छ । वियर रक्सी र वोतलमा राखिएको गुलावजामुन मिठाइ म्याद गुज्रिएको भेटिएपछि उत्पादकलाई फिर्ता गर्ने गरि अलग्गै राख्न निर्देशन दिंदै सञ्चालकलाई सचेत गराइएको छ ।
लेटाङ नगरपालिका उपप्रमुख तथा बजार अनुगमन समिति संयोजक कृष्णकुमारी निरौलाले नगरपालिकाले नियमित तालिका बनाएर व्यवसायलाई वर्गिकरण गरि मासिक रुपमा बजार अनुगमन गर्ने गरिएको जानकारी दिनुभयो । उहाँले यसअघि स्वास्थ्य सँस्थाहरु र मासुपसलहरुको अनुगमन गरिएकोमा यसपटक लेटाङको मुख्यबजार भन्दा बाहिर लेटाङ २ बुधबारे बजारमा किराना पसलहरुको अनुगमन गरिएको बताउनुभयो ।
उहाँले बजार अनुगमनका क्रममा कालोबजारी हुन नदिन, अखाद्य पदार्थ विक्री नगर्न सचेत गराउनुका साथै व्यवसाय सञ्चालका कानुनी प्रकृयाका बारेमा सचेतना जगाउने काम समेत गरिएको जानकारी दिनुभयो ।
नगरपालिकाकी अधिकृत सुस्मा कोइरालाले केही पसलमा म्यादगुज्रिएको सामान अलग्गै नराखिएको, मूल्य सूचि नराखिएको र नयाँ स्थापना गरिएका पसलहरुमा कागजपत्र नराखिएको जस्ता कैफियत भेटिएको बताउनुभयो । उहाँले पसलका सञ्चालकहरुलाई सचेत गराउँदै कमिकमजोरीलाई यथाशिघ्र सुधार गरेर जान निर्देशन दिइएको जानकारी दिनुभयो ।
यता लेटाङ २ बुधबारेका व्यवसायीहरुले लेटाङ नगरपालिकाले बजार अनुगमन गरेर आफुहरुलाई सजग बनाएको बताएका छन् । उनीहरुले व्यवसाय सञ्चालन गर्ने क्रममा व्यवसायीले नजानेर समेत गल्ती गरेको हुनसक्ने भन्दै नगरपालिकाले बेलाबेला बजार अनुगमन गरेर नीति नियम बारे सचेतना जगाउनु आवश्यक रहेको प्रतिकृया दिएका छन् ।
उपप्रमुख कृष्णकुमारी निरौलाको नेतृत्वमा रहेको अनुगमन टोलीमा प्रमुख प्राशसकीय अधिकृत विष्णुप्रसाद सुवेदी, लेटाङ २ का वडाध्यक्ष तेजप्रसाद तिम्सिना, योजना शाखा प्रमुख चेतनाथ गौतम, उद्योग वाणिज्य संघका महासचिव नेत्रप्रसाद निरौला, प्रहरी, नगर प्रहरी लगायत सञ्चारकर्मीको समेत सहभागिता रहेको थियो ।
