लेटाङ । मोरङको लेटाङमा शुक्रबार विविध कार्यक्रम गरि १० औं अन्तर्राष्ट्रिय योग दिवस मनाइएको छ । पतञ्जली योग नगर समिति लेटाङ र महिला पतञ्जली योग समिति लेटाङको संयुक्त आयोजनामा योग दिवसको शुभकामना आदन–प्रदान, योग विशेष शिष्टाचार अभ्यास, नाचगान र बालबालिकाहरुलाई शैक्षिक सामाग्री वितरण गरी अन्तार्राष्ट्रिय योग दिवस मनाइएको हो ।
लेटाङ–५ खेरुवास्थित ग्रीनपीस पार्टी प्यालेसमा भएको कार्यक्रममा विभिन्न योगाभ्यास, योग विशेष शिष्टाचार अभ्यास र नाचगान गर्नुका साथै पतञ्जली योगका साधकहरुले योगको महत्व बारे धारणा राख्नुभयो । सो अवसरमा लेटाङ जेसीजका अध्यक्ष दुर्गा घिमिरेका साथै उर्लावारी र पथरीबाट आएका जेसीजका अभियन्ताहरुको समेत सहभागिता रहेको थियो ।
यसैगरि योग दिवसकै अवसरमा पतञ्जली योग नगर समिति लेटाङ र महिला पतञ्जली योग समिति लेटाङको संयुक्त आयोजनामा लेटाङ नगरपालिका वडा नम्बर ३ स्थित चन्द्रमा बाल विकास केन्द्रका बालबालिकाहरुलाई भोजन गराउनुका साथै शैक्षिक सामाग्री वितरण गरिएको छ ।
सो कार्यक्रमका प्रमुख अतिथि लेटाङ नगरपालिका वडा नम्बर ३ का वडाध्यक्ष डम्बर बहादुर राईले बालविकास केन्द्रका बालबालिकाहरुलाई कपिकलम लगायतका शैक्षिक सामाग्री हस्तान्तरण गर्नुभयो । सो अवसरमा बोल्दै उहाँले शारिरिक र मानशिक दुवै स्वाथ्यका लागि योग महत्वपूर्ण रहेकाले स्वस्थ समाज निर्माण गर्न सबैले योग गर्नुपर्नेमा जोड दिनुभयो ।
यसैगरि पतञ्जली योग नगर समिति लेटाङका अध्यक्ष मोहन अधिकारीले योगको महत्व र अन्तर्राष्ट्रिय योग दिवसको इतिहास तथा थालनी बारे जानकारी गराउनुभयो । कार्यक्रममा महिला पतञ्जली योग समिति लेटाङका अध्यक्ष रेवा उदास लगायतका पदाधिकारीहरु र योग साधकहरुको समेत उपस्थिति रहेको थियो ।
