लेटाङ । लेटाङ नगरपालिकाले वर्षायाममा खोलाबाट हुनसक्ने जोखिम न्यूनिकरणका लागि तयारी थालेको छ । वर्षायाममा खोलाको बाढीले कटान गर्न थालेपछि रोकथाम गर्ने तिर लाग्नु भन्दा समय छँदै जोखिम न्यूनिकरण गर्दा उपयुक्त हुन्छ भन्ने ठहर गर्दै नगरपालिकाले जोखिम न्यूनिकरणका लागि तयारी थालेको हो ।
स्थानीय नगरवासीहरुको समेत गुनाशो आएपछि लेटाङ नगर प्रमुख भूपेन्द्र कुमार लावतीले चिसाङ खोलाका विभिन्न जोखिम क्षेत्रहरुको अवलोकन गरि सरोकारवालाहरुसँग छलफल गर्नु भएको छ । नगरपालिकाको आफ्नै श्रोतबाट मात्र खोलाको जोखिम न्यूनिकरण गर्न संभव नरहेको भन्दै उहाँले तत्कालिन रोकथाममा नगरपालिकाले लगानी गर्ने तथा दीर्घकालिन समाधानका लागि प्रदेश सरकारसमक्ष पहल गर्ने योजनाका साथ जोखिम स्थानहरुको अवलोकन गरिएको बताउनु भएको छ ।
नगर प्रमुख भूपेन्द्र कुमार लावती, नगरपालिकाका इञ्जिनियर भानुभक्त राई र सञ्चारकर्मीसहितको टोलीले जोखिममा रहेको लोखरा पैनीको मुहान र मदन भण्डारी राजमार्ग दक्षिण खोला पश्चिम तर्फको बाँधको अनुगमन गरेको हो ।
