विराटनगर । विराटनगरको घिनाघाटस्थित सिंघिया खोलामा महाशिव गंगा आरती सुरु गरिएको छ । साउन महिनाको पहिलो सोमबारको साइत पारेर गत सोमबार साँझदेखि विराटनगर–१९ घिनाघाटस्थित सिंघिया खोला किनारमा महाशिव गंगा आरती शुभारम्भ गरिएको हो । हेर्नुहोस् भिडियो समाचार ।
वैदिक सनातन धर्म संस्कृति संरक्षण अभियानको आयोजनामा वैदिक एवं सनातन परम्परा अनुसार शुरु गरिएको आरतीमा उल्लेख्य संख्यामा भक्तजनहरु सहभागी भएका छन् । देशका विभिन्न ठाउँमा नदी किनारमा शिवगंगा आरती गर्ने चलन रहेपनि विराटनगरमा भने पहिलोपटक सुरु गरिएकाले आरती हेर्न बाक्लो संख्यामा विराटनगबासी भेला भएका थिए ।
बनारसबाट प्रशिक्षित भएका झापाका पण्डितद्वय पुष्प गौतम र तुलसी खतिवडाले आरतीका निम्ति स्थानीय बटुकहरूताई १७ दिनसम्म प्रशिक्षण दिएपछि गंगाआरती सुरु गरिएको हो । अब प्रत्येक सोमबार साँझ आरतीलाई निरन्तरता दिइने आयोजक समितिका नेत्रप्रसाद निरौलाले जानकारी दिनुभयो । आरती शुभारम्भको क्रममा सबैभन्दा पहिले स्वस्तिवाचन, मंगलाचरण गरि दीप आरती र शिव ताण्डव स्तोत्र वाचन गरिएको थियो । 
सनातन धर्ममा गंगा आरती अनादिकालदेखि चलि आएको श्री लक्ष्मीनारायण मन्दिर पाञ्चालीका पिठाधीश स्वामी अच्युत प्रपन्नाचार्यले जानकारी दिनुभयो । जीवनमा जलको महत्व सर्वोपरि रहेको बताउँदै उहाँले गंगाआरतीका कारण खोलाको सरसफाईमा पनि मद्दत पुग्ने बताउनुभयो ।
विराटनगरको घिनाघाटमा सुरु भएको शिवगंगा आरतीले यहाँको धार्मिक पर्यटन विकासमा मद्दत पुग्नेछ । विराटनगरमा कमै मात्रामा पर्यटकीयस्थलहरु रहेकोमा स्थानीयवासीले साथ दिएमा घिनाघाटको गंगा आरतीस्थल एउटा आकर्षक धार्मिक पर्यटकीय गन्तव्य बन्न सक्ने देखिन्छ ।
