- तिलक राई
केराबारी । मोरङको केराबारी गाउँपालिका वडा नम्बर २ मा सञ्चालित दोस्रो हिलेथाम कप फुटबल प्रतियोगिताको उपाधि पिङबुङ फुटबल क्लव साँगुरीगढी धनकुटाले जितेको छ । प्रतियोगिताको आइतबार भएको फाइनल खेलमा मिक्लाजुङ फुटबल क्लबलाई ४–१ ले पराजित गर्दै पिङबुङ फुटबल क्लब सागुरीगढीले उपाधि जितेको हो ।
प्रतियोगिताको विजेता पिङबुङले ट्रफीसहित नगद १ लाख तथा दोश्रो हुने मिक्लाजुङले ट्रफीसहित ६५ हजार पुरस्कार पाएका छन् । साथै बेस्ट गोलकिपर, बेस्ट डिफेन्डर, राइजिङ प्लेयर, धेरै लगाउने खेलाडी र पहिलो गोल लगाउने खेलाडीलाई पनि ट्रफी मेडल र प्रमाणपत्र प्रदान गरिएको छ ।
आयोजक सँस्था हिलेथाम पर्यटन तथा खेलकुद विकास समितिका अध्यक्ष विक्रम शाही ठकुरी, कार्यक्रमका प्रमुख अतिथि केराबारी गाउँपालिका वडा नम्बर ९ का वडाध्यक्ष गोपाल याखा राई, विशिष्ट अतिथि वडासदस्य नगेन्द्रबहादुर ठकुरी लगायतले विजेता खेलाडीहरुलाई ट्रफि, प्रमाणपत्र तथा पुरस्कार रकम प्रदान गर्नुभयो ।
प्रतियोगितामा प्रथम पुरस्कारको रकम केराबारी गाउँपालिका र दोश्रो पुरस्कार रकम केराबारी गाउँपालिका वडा नम्बर २ को कार्यालयले उपलब्ध गराएका थिए भने विभिन्न संघ सँस्थाहरुले सहयोग गरेका थिए ।
प्रतियोगितामा लेटाङ फुटबल क्लव, सीसीडीआइसी फुटबल क्लव बुधुक धनकुटा, सिंहदेवी फुटबल क्लव, केराबारी फुटबल क्लव, मिक्लाजुङ फुटबल क्लव, रारा फुटबल क्लव र पिङबुङ फुटबल क्लव साँगुरीगडी गरि ८ वटा टीमले सहभागिता जनाएका थिए ।
हिलेथाम पर्यटन तथा खेलकुद विकास समितिको आयोजनामा फागुन १४ गतेबाट सुरु भएको प्रतियोगिता आज आइतबार सम्पन्न भएको हो । सो अवसरमा लिम्बू जातिको केलाङ नृत्य समेत प्रस्तुत गरिएको थियो ।
