मोरङ । आज असोज ३ गते अर्थात आठौं संविधान दिवस । संविधान दिवस २०८० अवसरमा आज देशभर विभिन्न कार्यक्रम भइरहेका छन् ।
देशभरका सरकारी तथा निजी कार्यालय, विदेशस्थित कूटनीतिक नियोग, राजनीतिक दल, नागरिक समाज, संघसंस्थालगायतले विभिन्न कार्यक्रम गरी संविधान दिवस मनाउँदै छन् ।
संविधान दिवसकै अवसरमा नेकपा एमालले राजधानीमा राष्ट्रिय झण्डासँग सेल्फी विषयक कार्यक्रम गरेको छ । यसैगरि बिहान टुँडिखेलमा राष्ट्रपति रामचन्द्र पौडेलको सहभागितामा संविधान दिवससम्बन्धी कार्यक्रममा गरिएको छ ।
समारोहमा राष्ट्रपति रामचन्द्र पौडेल, कार्यवाहक प्रधानमन्त्री पूर्णबहादुर खड्का, राष्ट्रियसभा अध्यक्ष गणेशप्रसाद तिमिल्सिना, मन्त्री, सांसद, कर्मचारी, सुरक्षा अंगका प्रमुखलगायत सहभागी हुनुभयो ।
टुँडिखेलमा आयोजित समारोहमा विभिन्न सांस्कृतिक झाँकी प्रदर्शन गरिएको छ । नेपाली सेनाको हेलिकप्टरबाट पुष्पवृष्टि गर्नुका साथै शान्तिको प्रतीक सेतो परेवा उडाइएको थियो । सरकारले आजको दिन सार्वजनिक विदा पनि दिंदै आएको छ ।
संघीय लोकतान्त्रिक गणतन्त्र नेपालका प्रथम राष्ट्रपति डा. रामवरण यादवले २०७२ असोज ३ गते ‘नेपालको संविधान २०७२’ जारी भएको घोषणा गर्नु भएकाले सोही दिनलाई स्मरण गर्दै संविधान दिवसको रुपमा मनाउने गरिएको छ ।
संविधान निर्माण भएर कार्यान्वयनमा आएको आठ वर्ष पूरा भएको छ । नयाँ संविधान लागू भएको घोषणासँगै नेपालको अन्तरिम संविधान २०६३ खारेज भएको थियो ।
संविधान जारी हुँदा संविधानसभाको अध्यक्षका रूपमा स्वर्गीय सुवासचन्द्र नेम्वाङ हुनुहुन्थ्यो । संविधान जारी नगर्न देशीविदेशी शक्तिहरुले दबाब दिइरहेका बेला अध्यक्ष नेम्वाङले संविधान जारी गर्नका लागि विशेष भूमिका खेल्नु भएको थियो ।
उहाँको केही दिनअघि निधन भएकोमा आज संविधान दिवसको अवसरमा भएका कार्यक्रमहरुमा एमाले नेता तथा संविधानसभा अध्यक्ष सुवासचन्द्र नेम्वाङलाई विशेष रुपमा सम्झना गरिएको छ ।
संघीयता, धर्म निरपेक्षता, समाजवादोन्मुख सघीय लोकतान्त्रिक गणतन्त्रात्मक शासन व्यवस्थालगायतका नयाँ व्यवस्था राखिएको यो संविधान जारी हुँदा संविधानसभाको प्रक्रियामा सहभागी दलका ५ सय ३७ जना सभासद्ले हस्ताक्षर गरेका थिए ।
‘नेपालको संविधान, २०७२’ मा ३५ भाग ३०८ धारा र ९ अनुसूची रहेका छन् । यही संविधान जारी गरेपछि भारतले नेपालमाथि अघोषित नाकाबन्दी लगाएको थियो ।
