जाँते । नोवेल एजुकेशन एण्ड डेभलपमेन्ट फाउण्डेशन लेटाङ ८ मा पूर्व प्राथमिक कक्षाका शिक्षिकाहरुका लागि तालिम सञ्चालन गरिएको छ । पूर्वका विभिन्न विद्यालयबाट भेला भएका करिव ७० जना शिक्षिकाहरुलाई आज शनिबार एकदिने तालिम प्रदान गरिएको हो ।
लावण्य इन्टरनेशनल प्रा लि को आयोजनामा पूर्वका लेटाङ, उर्लाबारी, विराटनगर, खोर्साने, गछिया, इटहरी लगायतका क्षेत्रमा रहेका विद्यालयका पूर्वप्राथमिक तहका शिक्षिकाहरुलाई थीम क्लष्टर विषयक कार्यशाला सञ्चालन गरिएको हो ।
पूर्वप्राथमिक तहका विद्यार्थीहरुलाई पाठ्यक्रमको थीम अनुशार कसरी अध्यापन गराउने तथा खेलाउँदै, अभ्यास गराउँदै कसरी सिकाउने भन्ने विषयमा तालिम केन्द्रीत रहेको लावण्य इन्टरनेशनल प्रा लि की प्रशिक्षक मनिशा कर्णले जानकारी दिनुभयो ।
लावण्य इन्टरनेशनलसँग सहकार्य गरेका विद्यालयका शिक्षिकाहरुका लागि हरेक महिना सामुहिक रुपमा तालिम प्रदान गर्ने गरिएकोमा यसपटक लेटाङ जाँतेको नोवेल एजुकेशनमा तालिम सञ्चालन गरिएको उहाँको भनाइ ।
नोवेल एजुकेशन एण्ड डेभलपमेन्ट फाउण्डेशनका प्रिन्सिपल भोलानाथ पाण्डेले यसै शैक्षिक सत्रदेखि पूर्वप्राथमिक तहको शैक्षिक गुणस्तर सुधारका लागि लावण्य इन्टरनेशनलसँगको सहकार्यमा शैक्षिक गतिविधि सञ्चालन गर्दै आएको जानकारी दिनुभयो ।
विद्यार्थीहरुलाई गुणस्तरीय शिक्षा कसरी दिन सकिन्छ भनेर खोजी गर्ने क्रममा लावण्य इन्टरनेशनलको कार्यक्रम मनपरेर सहकार्य गरि कार्यक्रम सुरु गरेको उहाँको भनाइ छ । यसरी सुरु गरिएको नयाँ पद्धतिको सिकाइ निकै प्रभावकारी भएको उहाँले बताउनुभयो ।
नोवेल एजुकेशनले विद्यार्थीहरुलाई पाठ्यपुस्तकको ज्ञानका साथै अन्य शिपमुलक तालिम प्रदान गर्ने, अतिरिक्त क्रियाकलापलाई प्राथमिकता दिने जस्ता नयाँ नयाँ शैक्षिक पद्धतिहरु लागु गरि पठनपाठन गराउँदै आएको छ ।
