सुन्दरहरैंचा । सुन्दरहरैंचामा विहीबारदेखि सुरु भएको पालिका स्तरीय उपमेयर कप महिला भलिवल प्रतियोगिता अन्तरगत पहिलो दिन भएका २ खेलमा लेटाङ र आयोजक सुन्दरहरैंचा विजयी भएका छन् । सुन्दरहरैँचा नगर खेलकुद विकास समितिको आयोजनामा सुन्दरहरंैचा १० स्थित सुकुना माविको खेल मैदानमा भएको उद्घाटन खेलमा सुन्दरहरैँचा नगरपालिकाले बुढीगंगा गाउँपालिकालाई २ ० को सोझो सेटमा पराजित गरेको हो । सुन्दरहरैँचाले बुढीगंगालाई पहिलो सेटमा २५ १२ र दोस्रो सेटमा २५ ११ ले पराजित गर्यो ।
यसैगरि दोश्रो खेलमा लेटाङ नगरपालिकाले बेलबारीलाई २ ० को सेटमा नै पराजित गरेको छ । लेटाङले पहिलो सेटमा २५ २३ र दोस्रो सेटमा २५ १९ ले बेलबारीलाई पराजित गरेको हो । विजयी भएका दुवै टीमले सेमिफाइलनमा स्थान पक्का गरेका छन् ।
प्रतियोगिताको विजेताले ट्रफिसहित ५० हजार र उपविजेताले ट्रफिसहित २५ हजार नगद पुरस्कार पाउनेछन् । प्रतियोगितामा मोरङ जिल्ला भरिका ८ वटा टीम सहभागी रहेका छन् । भोलि शुक्रबारको खेल रतुवामाई र कानेपोखरी तथा पथरी र केराबारीबिच हुने सदस्यसचिव खड्गबहादुर श्रेष्ठले जानकारी दिनुभयो ।
नगर उपप्रमुख तथा नगर खेलकुद विकास समिति उपाध्यक्ष अकली चौधरीको अध्यक्षतामा भएको उद्घाटन कार्यक्रमका जिल्ला समन्वय समिति मोरङका प्रमुख अजम्वर राईको प्रमुख आतिथ्यता रहेको थियो । प्रतियोगिता उद्घाटन गर्दै राईले खेलकुदले गाउँ नगरलाई मात्रै नभएर देशलाई चिनाउने भएकाले यसको विकासमा सबै लाग्नुपर्ने बताउनुभयो ।
यस्तै उपप्रमुख अकली चौधरीले नगर तथा देशको गौरव बढाउनुका साथै स्वास्थ्यका लागि समेत खेलकुद आवश्यक भएको बताउनुभयो । कार्यक्रममा नगरपालिकाका विभिन्न वडाका वडाध्यक्षहरु, कार्यपालिका सदस्यहरु, नगरका विभिन्न शाखाका प्रमुख, राजनीतिक दलका प्रमुख तथा प्रतिनिधि, विभिन्न संघ संस्थाका प्रतिनिधि तथा खेलप्रेमीहरुको उपस्थिति रहेको थियो ।
