मोरङ । वरिष्ठ गायक तथा संगीतकार भक्तराज आचार्यको ८१ वर्षको उमेरमा निधन भएको छ । सोमबार अपराह्न साढे ४ बजेतिर अचानक अक्सिजन लेभल कम भएपछि ललितपुरको मेडिसिटी अस्पताल लैजाने क्रममा बाटोमै निधन भएको पारिवारिक श्रोतले जनाएको छ ।
आचार्यको पार्थिव शरीरलाई मंगलबार बिहान ९ बजे संगीत तथा नाट्य प्रज्ञा प्रतिष्ठानको परिसरमा अन्तिम श्रद्धाञ्जलीका लागि राखिने भएको छ । राष्ट्रिय सम्मानका साथ उहाँको बिदाइ गर्ने तयारी छ ।
विक्रम संवत् १९९९ सालमा धनकुटामा जन्मिएका आचार्यको नेपाली सुगम संगीतमा विशिष्ट स्थान छ । उहाँ स्वरसम्राट नारायणगोपालका समकालीन गायक हुनुहुन्छ । आचार्यका मुटु जलिरहेछ, जति चोट दिन्छौ, जहाँ छन् बुद्धका आँखा, हजार सपनाहरुको, माया मेरी साँझ बिहान, हजार आँखा हेर्ने लगायत गीत लोकप्रिय छन् । उहाँले भजन पनि दर्जनौंको संख्यामा गाउनु भएको छ । आफ्नो जीवनकालमा आचार्यले झण्डै ४०० गीतमा स्वर तथा संगीत दिनु भएको छ ।
भजन शिरोमणिको उपाधिबाट प्रसिद्ध ८१ वर्षीय आचार्य ३० वर्षदेखि दूध मात्रै खाएर बाँचिरहनु भएको थियो । वि.सं २०४६ सालको एक साँझ बौद्धमा सांघातिक हमला भएपछि भक्तराजका टाउकामा झन्डै सयभन्दा बढी टाँका मार्नुपरेको थियो । त्यसयता लगभग उहाँको गायनयात्रामा विराम लाग्यो । उहाँका सुपुत्रद्वय सत्यराज आचार्य र स्वरुपराज आचार्य भने नेपाली गीत संगीतमा निकै चर्चित छन् । भजन शिरोमणि भक्तराज आचार्यप्रति हार्दिक श्रद्धासुमन, कालजयी भजन र गीतहरुमा तपाईं हामीमाझ अमर रहनुहुनेछ ।
