लेटाङ । लेटाङमा साहित्य र कला क्षेत्रको विकासका लागि विभिन्न गतिविधि सञ्चालन गर्दै आएको “लेटाङ साहित्य कला संगम” नामक संस्थालाई विधिवत रुपमा दर्ता गरिएको छ । २०६४ साल पौष २० गते स्थापना गरिएको संस्थाले लामो समय अनौपचारिक रुपमा गतिविधि सञ्चालन गर्दै आएकोमा २०८१ षौष २२ गते औपचारिक रुपमा स्थानीय सरकारको रुपमा रहेको नगरपालिकामा दर्ता गरिएको हो ।
लेटाङ नगरपालिकाको पौष १९ गते बसेको कार्यपालिका बैठकले गरेको निर्णय बमोजिम “लेटाङ साहित्य कला संगम” नामक संस्था दर्ता गरि नगरपालिकाले प्रमाणपत्र उपलब्ध गराएको छ । नगर प्रमुख भूपेन्द्र कुमार लावतीले संस्थाका अध्यक्ष गणेश दवाडीलाई दर्ताको प्रमाणपत्र हस्तान्तरण गर्नुभयो ।
संस्थाको गत मंसिर १ गते भएको अधिवेशनले नयाँ कार्य समिति चयन गरेको थियो । अधिवेशनले अध्यक्षमा गणेश दवाडी, उपाध्यक्ष शान्ति पाख्रीन, सचिव पर्शुराम निरौला, सहसचिव टंक बराल, कोषाध्यक्ष तारादेवी श्रेष्ठ, सदस्य यज्ञ पोखरेल, गोविन्द अधिकारी, जीवन पौडेल र अनुपमा घिमिरेलाई चयन गरेको थियो ।
१७ वर्ष अघि डिल्लीराम ओझा र ख्याम न्यौपाने लगायतको सक्रियतामा स्थापना गरिएको संस्थाले लेटाङका अग्रजहरु र लेटाङे कवि र कविता नामक २ पुस्तक प्रकाशन गरिसकेको छ । यसका साथै संस्थाले विभिन्न समयमा रचना वाचन, सहित्यिक गोष्ठि लगायतका कार्यक्रमहरु सञ्चालन गर्दै आएको छ । संस्थाले भर्खरै मात्र विभिन्न विद्यालयका विद्यार्थीहरुको सहभागितामा रचना वाचन कार्यक्रम सम्पन्न गरेको अध्यक्ष गणेश दवाडीले जानकारी दिनुभयो ।
