- उमेश चाम्लिङ
लेटाङ । लेटाङ ६ स्थित महाभारत माध्यमिक विद्यालयमा सिद्धार्थ युवा क्लव छात्रवृत्ति अक्षयकोष स्थापना गरिएको छ । विद्यालयका विपन्न तथा जेहेन्दार विद्यार्थीहरुलाई छात्रवृत्ति वितरण गर्ने उद्देश्यका साथ ५३ हजार ३ सय ५० रुपैयाँको सिद्धार्थ युथ क्लव छात्रवृत्ति अक्षयकोष स्थापना गरिएको हो ।
आज शुक्रबार विद्यालयमा आयोजित कार्यक्रमका बीच विद्यालय व्यवस्थापन समितिका अध्यक्ष पूर्ण बहादुर तामाङलाई क्लवका अभियन्ताहरुले ५३ हजार ३ सय ५० रुपैयाँको चेकको नमुना हस्तान्तरण गरेका छन् । गत कार्तीकमा जाजरकोट र रुकुममा गएको भूकम्पमा परेकाहरुलाई सहयोग गर्न सिद्धार्थ युवा क्लवको अगुवाइमा संकलन गरिएको रकम भूकम्प पीडितलाई प्रदान गर्न नपाएपछि सोही रकमबाट अक्षयकोष स्थापना गरिएको सिद्धार्थ युवा क्लवका संयोजक भरत राईले जानकारी दिनुभयो ।
भूकम्प पीडितका लागि सहयोग रकम उठाइएको भएपनि तत्कालिन अवस्थामा सरकारको एकद्वार प्रणालीबाट मात्र सहयोग गर्न पाईने नीतिका कारण सहयोग संकलन स्थगित गरि संकलित रकमबाट अक्षयकोष स्थापना गर्ने निर्णय गरिएको संयोजक राईले जानकारी दिनुभयो ।
