विराटनगर । राष्ट्रिय शैक्षिक परामर्श संघ कोशी प्रदेशले विराटनगर महानगरपालिकाका बाढीपीडितका लागि आर्थिक सहयोग हस्तान्तरण गरेको छ । संघले आफ्नो छैटौँ वार्षिकोत्सवको खर्च कटाएर महानगरका बाढीपीडितका आर्थिक सहयोग उपलब्ध गराएको हो । बिहीबार महानगरमा पुगेर संघका पदाधिकारीहरुले मेयर नागेश कोइरालालाई ५० हजार ५ सय ५५ रुपैयाँ बराबरको चेक हस्तान्तरण गरेका छन् ।
विराटनगर वडा नम्बर ८ का अध्यक्ष राम पोखरेलसमेतको उपस्थितिमा संघका प्रदेश अध्यक्ष सन्तोष कुरुङ्वाङ, सचिव नरेन्द्र दंगाल, संस्थापक अध्यक्ष मोहन तिगेला, सल्लाहकार टीका ढकाललगायतले मेयर कोइरालालाई चेक हस्तान्तरण गर्नुभयो । वार्षिकोत्सवका अवसरमा गरिने कार्यक्रममा लाग्ने खर्च यसपटक बाढीपीडितका लागि सहयोग गरेको संघका सचिव नरेन्द्र दंगालले जानकारी दिनुभयो ।
मेयर कोइराला र वडाध्यक्ष पोखरेलले सहयोग रकम प्रदान गरेकोमा संघलाई धन्यवाद व्यक्त गर्नुभयो । विराटनगर महानगरपालिका ८ नम्बर वडा कार्यालयको मातहतमा छुट्टै राहत कोष स्थापना गरेर रकम जम्मा गरि वडा नम्बर ८ का बाढीपीडितलाई राहत उपलब्ध गराइने बताइएको छ ।
